dr nouh ........الشهير بالأبّوح

في ليلة حالكة من ليالي الصيف الحارة... راودتني تلك الفكرة الشريرة .. قلت لنفسي : لم لا؟...فأنا في النهاية مازلت في الفرقة الخامسة (يعني بذاكر) وهو بالامتياز ( مرادف لصايع). أضف الى ذلك ما يتمتع به الرجل من صفات المدون الناجح فهو ذكي لماح .. وله أسلوب جميل في الكتابة .. ومنطق قوي وروح مرحة ...انها فكرة جيدة .او هكذا بدت مع حرارة الجو وضغط "الباطنة".
فتحت الماسنجر ..وكان كالعادة و رغم تأخر الوقت"أون لاين" (امتياااااز) ... وبدون مقدمات :
:xezo أحمد تكتب معايا؟
Dr Nouh: فين؟
:xezo في المدونة ياأحمد هايكون فين؟
Dr Nouh: مدونة مين؟ (سبق الاشارة الى حدة ذكاء الرجل وسرعة بديهته).ا
صباح العسل :D :xezo
Dr Nouh: اها مدونتك؟ تصدق فكرة جبارة!! أنا كنت لسة هاخد رأيك لو عملت مدونة تكون إيه رسالتها؟ بس ايه اللي جاب في دماغك الفكرة دي يعني؟
أبدا انت عارف أنا راجل صاحب "باطنة" وبعدين انا لاقيتك بتمضي" مجهول" قولت المك في مدونة :xezo
Dr Nouh: طيب ايه رأيك أدخل بأسم ايه؟
:xezo مش مهم الاسم ياحمد اي حاجة "المنشد العام" تقضي
Dr Nouh: لا لا انا كبرت على الانشاد عاوز اسم تاني

وبعد ساعتين....

xezo : ارحمني ابوس ايدك انا غلطان حقك عليا .. آخر مرة ...بص المدونة مغلقة للصلاه
Dr Nouh: بتكلم جد يا أخ زيزو عاوز اسم كويس. ( أخ و زيزو(!!
يا احمد انا اقترحت عليك 5000 اسم .. أقولك سميه " أسم كويس" :xezo
Dr Nouh: انا مابهرجش يا زيزو
:xezo فكرة حلوة "أنا مابهرجش" والله لايق عليك الاسم ده

وبعدين ساعتين ...

Dr Nouh: ايه رأيك في .. دكتور نوح
:xezo ياااااااااااه .. رااااااااااائع...مالوش حل...كان تايه علينا فين ده دوس أكسبت" بقى ياأخي خليني اقوم انام . ( للعلم فقط: الاسم الأخير تم اقتراحة حوالي 15 مرة )
Dr Nouh: طيب بالعربي ولا بالانجليزي؟
(بالانجليزي يااحمد . (يارب نخلص :xezo
Dr Nouh: اكتب دكتور نوح ولا نوح بس؟
:xezo دكتور نوح احلى
Dr Nouh: خلاص ياعم عشان مش عاوز اعطلك .."أكسبت"
إيه رأيك بقى رسالتي اللي أكتب عنها تكون ايه "تصحيح مفاهيم" ولا "اخبارية" ولا "شخصية" ولا "نقد للمجتمع" ولا "رد على الشبهات" ولا "رصد عيوب الاجيال الشابة" ولا "اقتراح حلول لمشاكلنا"........(ويستمر ويستمر ويستمر ويستمر....)

احنا عاوزين نغير شكل المدونة خالص..وعاوزين نعملها اعلانات بدل ماهي بتنش كدة .. عاوزينها توصل للعالمية..انا اكتشفت ان المدون لازم يتابع المدونات ويرد عليها.. ولازم يكتب بانتظام من خمس لست مرات في الاسبوع.. ولازم يرد على تعليقات الناس اول بأول.. بص احنا هانعتمد في تطويرنا للمدونة على اسلوب لامنعكس ينبع من احساسنا الباطن بالقضايا المعاصرة وفي نفس الوقت..
( ويستمر ويستمر ويستمر....)

اترك بقية الحوار لخيال الزائر الكريم لاني لا اظن ان بالمدونة مساحة تكفي حتى لإختصاره!!!

**********************************

ملاحيظ مش مهمة: ا
* اختصار البوست الصفيق ده ان الاخ الكريم والزميل العزيزDr Nouh ان شاء الله هاينور المدونة بكتاباته ربنا يدينا ويديكم طولة العمر وربنا يسامحنا على الجريمة الشنيعة اللي بنرتكبها في حق التدوين في مصر

* أخي الكبير واستاذي و صديقى اللدود Dr Nouh طبعا مش محتاج اقولك اني بهزر معاك وفي انتظار بوستك الاول ( احبك في الله)

كيف تزرع القنبلة؟

أنا من تراب وماء

خذوا حذركم أيها السابلة

خطاكم على جثتي نازلة

وصمتي سخاء

لأن التراب صميم البقاء

وأن الخطى زائلة

ولكن إذا ما حبستم بصدري الهواء

سلوا الأرض عن مبدأ الزلزلة

سلوا عن جنوني ضمير الشتاء

أنا الغيمة المثقلة

إذا أجهشت بالبكاء

فإن الصواعق في دمعها مرسلة

أجل إنني أنحني فاشهدوا ذلتي الباسلة

فلا تنحني الشمس إلا لتبلغ قلب السماء

ولا تنحني السنبلة

إذا لم تكن مثقلة

ولكنها ساعة الإنحناء

تواري بذور البقاء

فتخفي برحم الثرى ثورة مقبلة

أجل إنني أنحني تحت سيف العناء

ولكن صمتي هو الجلجلة

وذل انحنائي هو الكبرياء

لأني أبالغ في الإنحناء

.لكي أزرع القنـبـلة

**أحمد مطر**

عرق الخنوعة نقححححح قام الاضراب فشل

عجبا لشعب يساق نحو الموت

... ويصمت

!!.مهابة التوبيخ

******

...إن شعبا يقدم أمنه على حريته

لا يستحق الأمن .... ولا الحرية

******

كدب منعكش

قالوا زمان في الامثال ( كدب مساوي ولا صدق منعكش) انما كدب منكش؟!! اهي دي بقى الخيبة التقيلة.

لو الفنان محمد المصري – أبو لمعة - لسة موجود وسمع الفشرة دي . كان اعلن اعتزالة على الفور وترك الساحة لمن هو أجدر منه باللقب واكثر قدرة على التلفيق واختلاق الأكاذيب المضحكة.
"الغبي" مش اللي يصدق الاتهامات العبيطة دي.
" الغبي". اللي يظن ان في بني آدم في الدنيا ممكن يصدق خبر زي ده؟!!
قال ايه "خير اللهم ما اجعله خير" أستاذ التفسير وعلوم القرآن بجامعة الازهر و وكيل الكلية والعالم الجليل د\ عبد الحي الفرماوي كون خلية بالتعاون مع عناصر من حماس لشراء معدات واجهزة من احد المحلات في مدينة نصر !!!. لصناعة طائرة بدون طيار لاغتيال عناصر فلسطينية داخل مصر .

ثم ادرك شهرزاد الصباح فسكتت عن الكلام المباح..
ايييييييييييه الهبل ده؟؟!!!

ولما الطائرات متوفرة في محلات مصرالجديدة ماطلبهاش دليفيري ليه؟

الحقيقة انا اول ما سمعت الخبر وبعد حالة من الضحك الهستيري استمرت عدة دقائق تلاها مرحلة اخرى من القرف والاشمئزاز ورغبة في افراغ محتويات معدتي استمرت عدة ساعات. وجدت اننا أمام حالة من اتنين لا ثالث لهما:
اما حالة من البجاحة والبلطجة والاستخفاف بالشعب المصري لدرجة ان النظام لم يكلف نفسه عناء البحث عن حجة مبلوعة ومحبوكة شوية عن دي لانه مش مهتم اصلا بالرأي العام ولا بيحاول اقناعه واللى مش عاجبه يشرب من البحر !!
او حالة من الغباء والسذاجة والهبل بحيث عجزت عقول النظام – مع افتراض وجودها في الحالة دي –عن توليف رواية بوليسية مقنعة لربط الاخوان بحماس في اذهان الشعب المصري ثم ربط الاثنين بالارهاب وبتهديد أمن مصر.
احكموا انتم ياعاقلين......